“SOCAR Methanol” mayda istehsalı bərpa edib

“SOCAR Methanol” mayda istehsalı bərpa edib

“SOCAR Methanol” MMC əsaslı təmirdən sonra may ayında metanol istehsalını bərpa edib. Bu barədə agentliyinə Dövlət Statistika Komitəsindən məlumat verilib.

““SOCAR Methanol” zavodunda əsaslı təmir işlərinin aparılması ilə əlaqədar metanol istehsalı cari ilin yanvar ayından aprel ayına qədər dayandırılmışdı. May ayında müəssisə fəaliyyətini tam gücü ilə bərpa edib”, - deyə məlumatda bildirilir.

May ayında müəssisədə 47,2 min ton metanol istehsal olunub. İstehsalın həcmi illik ifadədə (2021-ci ilin yanvar-may/2020-ci ilin yanvar-may ayları) 4,3 dəfə azalıb.

Bundan əlavə, iyunun 1-nə olan vəziyyətə görə, müəssisənin anbarında 28,5 min ton metanol olub.

Dövlət Gömrük Komitəsindən verilən məlumata görə, may ayında “SOCAR Methanol”da istehsal edilmiş məhsullar ixraca göndərilməyib.

2020-ci ildə “SOCAR Methanol” 476,6 min ton metanol istehsal edib ki, bu da 2019-cu ilin göstəricisindən 24,4% çoxdur. 2021-ci il yanvarın 1-nə müəssisənin anbarında 4,2 min ton hazır məhsul olub.

Bakı şəhərinin Qaradağ rayonunda yerləşən Metanol zavodu “AzMeCo” şirkəti tərəfindən inşa edilib. Zavodun inşasına $500 milyona yaxın sərmayə qoyulub. Zavodun illik istehsal gücü 720 min ton metil spirti təşkil edir.

SOCAR məhkəmənin qərarı ilə Azərbaycan Beynəlxalq Bankından alınaraq “Aqrarkredit” QSC-nin sərəncamına verilmiş müəssisəni sonuncudan 810 milyon manata alıb.

Marja.az Telegramda: https://t.me/marjaaz

İnterfaks-Azərbaycan