Zaqatala, 29 mart, Mustafa Dadaşov, AZƏRTAC
Martın 29-da Zaqatala rayonunun Aşağı Tala və Yuxarı Tala kəndlərinin içməli suya olan tələbatının ödənilməsi məqsədilə çəkilən yeni su xəttinin açılış mərasimi olub.
Bu barədə AZƏRTAC-ın bölgə müxbirinə Zaqatala Rayon İcra Hakimiyyətindən məlumat verilib.
Bildirilib ki, uzun müddət su problemi ilə üzləşən bu kəndlərin ümumilikdə 15 minədək sakinini içməli su ilə təmin edəcək yeni su xətti daxili imkanlar hesabına çəkilib. Su xəttinin çəkilişi rayon icra hakimiyyəti, kənd bələdiyyəsi və sakinlərin dəstəyi ilə ərsəyə gəlib. 500 millimetr diametrli borularla çəkilən xəttin uzunluğu 1,2 kilometrdir.
